Aiaraldeara indartsu itzuli dira herriko jaiak. Bi urteko parentesiaren ostean ohiko bidetik dira berriz festak gurean. Jada, besteak beste, Aiarako San Prudentzio eta Amurrioko San Jose auzoko jaiak ospatu dira eta orain, azken txanpan dira Urduñako Otxomaioak. Jaiak sozializaziorako aukera aparta dira; kultur eztanda bat. Denboraldia ireki berri den honetan, gogoeta egiteko aukera paregabea dugu. Nola zaindu, bultzatu, prestigiatu,… gure hizkuntza herriko jaietan?

Urduñako adibidea

Agerikoena, programazioan eta komunikazioan euskararen eta euskarazko kulturaren presentzia bermatzea da, baina badago bestelako neurriak hartzea. Ohikoa izaten da, hainbat herritan adibidez, ferietako barraketako arduradunei euskal musika jartzeko materiala helaraztea, euskararen aldeko mezuak zabaltzeko askotariko materiala egitea edota kanpaina bat sustatzea.

Otxomaio betean gaudela, bertako kasua adibide izan daiteke. Gora Otxomaio euskaldun! kanpainaz euskara jaien baitan bultzatzeko neurri sorta prestatu du udaleko euskara sailak. Lehen aipatu ditugun neurriezgain azpimarragarriak deritzogun bestelako neurri batzuk ekarri ditu kanpaina honek: txosna eta ostalaritzari zuzenduak.

Txosnak

Txosnei dagokionez, udalak hizkuntza-irizpide zehatzak ezarri ditu, praktikoak, kostu ekonomikorik gabekoak, erraz betetzekoak eta eraginkorrak izan daitezkeenak. Bat, txosnetako idatzizko elementu guztiak euskaraz egongo dira eta elebitan egotekotan lehentasuna euskarari eman behar zaio. Bi, txanda guztietan pertsona euskaldun bat izango dela bermatu behar da. Hiru, agurra eta lehen hitzak euskaraz izango dira beti. Gainera, bezeroa gaztea baldin bada euskarari eutsiko zaio, zenbat eta gazteagoa izan orduan eta euskara gehiago erabili, bezeroak gaztelaniaz erantzun (elkarrizketa elebidunak, Euskaraldiaren proposamenaren bidetik). Lau, txosnaguneko musikaren %65a, gutxienez, euskarazkoa izango da. Bost, bozgoragailuetatik zabaltzen den informazio oro elebitan eman behar da, euskara aurretik jarriz. Sei, ekitaldiak antolatzekotan euskararen lehentasunezko presentzia bermatuko da eta ekintzak publiko adingabe bati zuzenduak badira euskara hutsean izango dira.

Tabernak

Ostalaritzaren sektoreari gutun bidez udalak honako proposamenak helarazi dizkio, kanpainaren berri ematearekin batera. Bat, lokalean agerian jartzen dituzten prezioak eta oharrak elebitan jartzea eskatzen da, horretarako udalaren itzulpen zerbitzua muxu-truk eskainiz. Bi, euskarazko musikaren presentzia bultzateko hainbat udalerrirekin eta aldundiarekin batera 12 orduko iraupena duen estilo anitzeko euskarazko musikarekin osatutako playlistaren berri ematen da, hori nola eskuratu eta erabili azaltzeko euskara arlora jotzeko gonbita eginez. Hiru, kanpainako leloa duen materiala erakusgarri izan eta erabiltzeko aukera baliatzeko eskatzen da. Lau, txanda guztietan pertsona euskaldun bat izango dela bermatzea zeinen garrantzitsua den azpimarratzen da gutunean. Pertsona horien lehen agurra beti euskaraz izatea aholkatzen da baita.

Pausu gehiago eman daitezke eta eman behar dira, baina abiapuntu bat izan daiteke hau, gure herriko jaietan euskara bultzatzeko. Bidea egin dezagun, pausuak eginez, gelditu barik.

Mintzatu. Kontsumitu. Inplikatu
#Euskaraktibatu